رسالة ترحيبية

مرحبا بكم في مدونة تعلم السياقة ، أتمنى أن تنال إعجابك عزيزتي القارئة.

السلام عليكم ورحمة الله وبركاته

اخواتي العزيزات

هذا الموضوع فتحته بعد ما شفت مواضيع الاخوات في البحث عن مدارس التعليم والمدربات

وايضا ليكون مرجع شامل لكل متدربه تريد الحصول على الليسن

 اول شي بالنسبه لمدربات السواقه عندي الارقام بس اريد آخذ اذن المشرفات بوضعها في الموضوع لتوفير الوقت والجهد على الجميع

ثانيا نبدأ بالاوراق اللازمه والاجراآت الضروريه

                           1 ) الاوراق المطلوبه :

                                             صورة جواز السفر
                                           خلاصة القيد
                                          صور شخصيه
                                    حضور ولي امرج (يعني اذا كنتي امعرسه شلي ريلج واذا لا ابوج)
          صورة جواز سفر ولي الامر
   مبلغ 100 درهم في المرور
            و 20عند فحص النظر في المرور
  وفي المدرسه النظري 830درهم

ثانيا : الدروس

الدرس الاول : الريوس

طبعا الحين بتقولون شو نسوي

احب اطمنكم كلكم ان الباركنج والريوس جدا سهل

بس الاهم هو ان الرهبه من السياره تروح

وهذي ممكن نقضي عليها بالتدريب

كيف ؟

يعني سيارة الوالد او الزوج او الاخ او الاخت نطلع عليها كل يوم شوي في اماكن مافيها حد علشان نزيل الخوف وصدقوني بتكون السياره مثل اللعبه في ايدكم

وبعد ما تروح الرهبه نجي للجد

اختاري رصيف وحاولي تمشي بالسياره موازيه للرصيف مع الحفاظ على نفس المسافه

المهم

الحين جد الجد

قبل التراي بفتره روحي خذي حصه وحده ريويس ( ساعه وحده بس ) وسجلي الخطوات في دفتر علشان ما تنسين وبعدين خذي ثاني يوم حصه وحده باركنج ونفس الشي سجلي الخطوات في دفتر وياريت تسجلينها وانتي مع المدربه علشان لو نسيتي تراجعينها

هذي الخطوه وايد مفيده وبتوفر عليج جهد كبير وفلوس

الدرس الثاني : الباركنج

 هذه صوره توضح الباركنج

الدرس الثالث : الشارع

في هذا الدرس اخواتي اولا بنتبع خطوات مهمه جدا علشان ما ننسى اي شي

احفظي هذي الخطوات بالترتيب وبالارقام علشان ما تنسي

1)ركبتي السياره عدلي الكرسي بحيث تكون قدمك مرتاحه مع البترول والفرامل لا بيعيده ولا قريبه 

2)عدلي المرايات بحيث تستطيعين كشف الشارع 

 3)ضعي غيار الجير على ال D اذا بتنطلقي للأمام أو على ال R اذا بترجعين للخلف

4) نزلي فرامل اليد وسيري على بركة الله

شاطره وممتازه اذا طبقتي الخطوات بالحرف

الحين يينا على التركيز في الشارع وكيف اتحكم في السياره

( يا ويلي لحقوني ما شايفه شي بالشارع غير الخطوط والطريق متر قدام السياره )

طبعا هذا اللي انتي شايفتنه الحين وهذا طبيعي جدا انتي خايفه ومش قادره تركزين في شي غير مسافه صغيره قدام السياره ولا تخافي عادي مع الوقت بتبدين تشوفين حواليج وتركزين

اول شي الستيرنج مال السياره خفيف وايد وما يحتاج لف قو بالعكس همسه يمين او همسه يسار بتتحرك السياره وياج مثل الشوكولاه

المهم
علشان توزنين السياره اعتبري نفسج تمشين في الشارع بريولج بدون سياره وخلي نفسج في منتصف المسار اللي تمشين فيه

الحين تمي ادربي على هذي النقطه بسيارة البيت ولازم يكون وياج حد زوجج او ابوج او اخوج
وخليج بعيد عن الزحمه الله يرضى عليج مو ناقصين مصايب بعدين تقولين ام الكباتن قالتلي


 طيب الحين وانتي ماشيه قابلج مطب وقابلج مرور مشاه واشارات
وكل هذيل لازم تخفين السرعه
طيب كيف نخفف السرعه

نخفف السرعه بداية اللوحه اللي تحذرنا بوجود مطب او اشاره بالضغط على الفرامل بالتدريج

طيب عند المطب لازم نخفف السرعه وايد بس مو لدرجة ان السياره توقف

بما معناه ان السياره يتم فيها سرعه خفيفه تخليها تعدي المطب بدون ما ندوس بترول

طيب الحين العجلات الاماميه عدت المطب الحين ندوس بترول ونبدى نتدرج في السرعه لين نوصل السرعه المحدده .

شكرا اخواتي للمرور

ان شاء الله باجر انزل باقي الموضوع

تابعوا معنا